اولماسادا

یانیندا دلبریمین اعتباریم اولماسادا
یئنه غمین چکرم، غمگساریم اولماسادا
بدنده یاری جانیم قالماییب، گئدیب یاریم
گرک دوزهم غمِ هیجرانه، یاریم اولماسادا
گونوم کی، تار اولوب اول زولف الیندن، ای تاری
ترنم ائیله، سنی تانری، تاریم اولماسادا
اوزون خیالی بسیمدیر بهشتِ کویوندا
یوز ایل خیالیما گلمز، بهاریم اولماسادا
لبینله مست گؤزون هر دوشنده خاطریمه
شرابه رغبتیم آرتیر، خُوماریم اولماسادا
منیم بیر آهیم ایله شمعلر یانیر گئجهلر
توخونما، شعلهٔ عشقم، شراریم اولماسادا
کمندِ زولفله، واحد، اؤزوم شیکار اولدوم
منیم او آهو باخشلی شیکاریم اولماسادا