روحون غذاسی وار!

هر دلبرین کی، عاشیقه جور و جفاسی وار
ظن ائتمه بیوفا اونو، چونکی وفاسی وار
پروانه ایله بولبولو بیر توتما عشقده
پروانه یانسا، بولبولون آنجاق نواسی وار
اول قاره گؤزلره دئمه بیر مبتلا منم
مینلرجه من کیمی او گؤزون مبتلاسی وار
روحون غذاسیدیر دئییر عالم شراب اوچون
بیلمیر کی، لبلرین کیمی روحون غذاسی وار
واحد اسیریدیر ائله بیر نازنین گولون
عشقینده دایماً او گولون مین بلاسی وار