گؤزلدیر

هر عاشیقه اؤز ایسته دیگی یاری گؤزلدیر
هر بولبوله اؤز سئودیگی گولزاری گؤزلدیر
ایلقاری گؤزل اولمایانی ایسته مز عاشیق
جان وئر ائله جانانا کی، ایلقاری گؤزلدیر
من بیر اؤجا بویلو گؤزلین زولفونه بندم
روخساری گؤزل، شیوه سی، رفتاری گؤزلدیر
یوزلرجه گؤزل باشقا ولایتده ده چوخدور
آمّا بیزیم اؤلکه بوتون ائلجاری گؤزلدیر
یار اولسا منیمله، منه بیگانه نه ائیلر،
اوُچماز ائله بیر خانه کی، معماری گؤزلدیر
من ایسته دیگیم چون او گولو غئیری ده سئودی
قیمتلی او شئیدیرکی، خریداری گؤزلدیر
واحد، منه انصاف ائله، سیما ایله باخما!
احسن، ائله بیر شاعیره، اشعاری گؤزلدیر