آغلار، آغلاماز!

هر عاشیقین کی محنتی وار، آغلار، آغلاماز؟!
وصل نیگارا حسرتی وار، آغلار، آغلاماز؟!
بیر بیوفا نیگاردان اؤترو گدا ایدیم
خاین رقیبه منتی وار، آغلار، آغلاماز؟!
ائلدن دوشوب کنارا، وطندن اوُزاقلاشیب
غربتده مین اذّیتی وار، آغلار، آغلاماز؟!
ایستکلی دلبری گئدیب اغیاره یار اولوب
بد نام اولوب خجالتی وار، آغلار، آغلاماز؟!
یارب او کس کی مرد اولا، نامرد ظالیمین
دایم اونا خیانتی وار، آغلار، آغلاماز؟!
مغرور اولوب او کیمسه، یوخ اصلی، نجابتی
کیم اهل اولوب، نجابتی وار، آغلار، آغلاماز؟!
یاندیرسا، واحدا، فلگی آهیم آتشی
اوندان کیمین شکایتی وار، آغلار، آغلاماز؟!