خیالِ خام!

سنی من، ای بوتِ مه رو، اؤزومه آشنا دئردیم
خیال ائدیب، جانا، سنی اهلِ وفا دئردیم
دولانیردیم سرِ کویوندا، بالله، زار و دلخسته
سنین اول خاکِ پاییندان اؤزومه من شفا دئردیم
نه رحمین وار، نه انصافین، منی بوقدر اینجیتدین
او شیرین لبلرین شهدین بو دردیمه دوا دئردیم
سنی من رحم دل ساندیم، عدو اولدون منِ زاره
عدو اولماقلیغین، جانا، همیشه بر ملا دئردیم
کمنده او قارا زولفون سالیبدیر واحدِ زاری
جهاندا تیره بخت اولماغینی کارِ قضا دئردیم