منو
نقطهٔ قرآن دیر بو
سنی گؤردوکده دئدیم: خسرو خوباندیر بو
بو وجاهتله، حقیقت، مهِ کنعاندیر بو
دلِ غمگینیمی شاد ائتدین، آتیب غمزه ن اوخون
سنه قوربان اولوم، ای شوخ، نه احساندیر بو
خط و خالین گؤروب اول مصحف، رویوندا، دئدیم
بو سواد ایله یقین نقطهٔ قرآن دیر بو
منه پیوسته نه اوخ آتسا او ابروی کمان
دل باسار باغرینا، گلدیکجه دئیر جاندیر بو
ای دئین ائیله‌مه هیجران گونو فریاد و فغان
نئجه فریاد و فغان ائتمه ییم هیجراندیر بو
چونکی چوخ گؤرموشم اغیارا وفا ائیله دیگین
بیوفا سؤیله سه هر کیم سنه، بهتاندیر بو
خلق سؤیلر منی، واحد، گؤروب اول زولفه اسیر
فی الحقیقت، هله دیوانهٔ دؤوراندیر بو