منو
دئییل کیمسه هنردن خالی!
سانما، ای دل، هنری ذؤقِ بشردن خالی
احتیاط ائت، دئییل هئچ کیمسه هنردن خالی
دوغمامیش مادرِ ایّام هنرسیز بیر ذات
گلمه‌میش دهره نه بیر مرد تپردن خالی
افترا ائیله‌مه حاقیندا هنر صاحبی نین
کی، دئییل اهلِ هنر مدِّ نظردن خالی
صاحبِ عقل و هنردیر هره اؤز قدرینجه
بیر نهالیق، دئمه بیز، هئچ ثمردن خالی
سالک اول، گمراها یول گؤستر، ا گر عارفسن
اولسا هر کس، توت الین راهِ کدردن خالی
نقد سرمایه سین، البته وئریر یغمایه
پاسبان گر اولا گنجینهٔ زردن خالی
وادیِ جهله قدم قویما، تاپارسان آفت
فی المثل، بحر اولاماز خوف و خطردن خالی
بو هنردن می دئییل، عالمی آتش بورویوب؟
بیر گون اولماز، اولا کیم دهرِ شرردن خالی
بیردم انصاف ایله باخ، آچما حسودانه گؤزون
ائیله مرآت دلین رنگِ کدردن خالی
واحدا، طولِ کلام ائیله‌مه چوخ، ساخلا دیلین
سؤزو آز ائت، اولاسان، بلکه، ضرردن خالی