منو
قوجالیق
قوجالیق سالدی ایاقدان منی ای داد ئولورم
دوشمه یر ایندی جوانلیق اله فریاد ئولورم
گوزومون نوری گئدیب دیزده یوخومدر طاقت
باخیرام من ایشین ازوایشینه هر ساعت
گورورم هردم ئوزومده بیر عجایب حالت
گئجه‌لر صبحه کیمی یاتمایرام هیچ راحت
دوشمه یر ایندی جوانلیق اله فریاد ئولورم
بیر کسیم قالمامیش عرض ائیله یم ئوز احوالیمی
درد چکمکدن آقارمیش بو قارا ساقالیمی
بیر گونی ائیلمز امداد منه اقبالیمی
قوجالیق سالدی ایاقدان منی ای داد ئولورم
دوشمه یر ایندی جوانلیق اله فریاد ئولورم
گئتدی الدن نقدر واریم ایدی جاه و جلال
ذرّه جه قالمامیش اصلاً داها دولت و مال
آلیب اطرافیمی لشگر کیمی اندوه و ملال
قوجالیق سالدی ایاقدان منی ای داد ئولورم
دوشمه یر ایندی جوانلیق اله فریاد ئولورم
نئجه آسوده اولور درد و بلادن باشیم
آغلاماقدان جوشوب عُمّانه دونوب گوز یاشیم
همت ائتمز منه اصلاً نه قوهوم قارداشیم
بئله بیر گونده که هشتادی گئچیبدر یاشیم
قوجالیق سالدی ایاقدان منی ای داد ئولورم
دوشمه یر ایندی جوانلیق اله فریاد ئولورم
خوش او گونلر که جونلیقدا جلالیم وار ایدی
حق بیلیر کیم نه قدر دولت و مالیم وار ایدی
نه ده بیر بئیله منیم درد و ملالیم وار ایدی
قوجالیق سالدی ایاقدان منی ای داد ئولورم
دوشمه یر ایندی جوانلیق اله فریاد ئولورم