منو
گلمیشیک مبارک باده!
ساقی، بو مجلیسین عشقینله دولاندیر باده
عؤمروموز حسرت مئیله نییه گئتسین باده!؟
هامی نین سئوگیسی، بیر آرزوسو وار قلبینده
چونکی بولبول گولون عشقینده گلیر فریاده
نسل ایله آد قالیر عالمده، حقیقت در بو
مئیوه سیز بیر آغاج، البته، گئدر تئز باده
باشقا بیر لذتی وادیر، بیر آتا ساغکن اؤزو
آتالیق حقینی ایفا ائله سین اؤولاده
ییغا اؤز باشینا حؤرمتلی قوهوم، قارداشینی
بوندان آرتیق نه گوزه ل آرزو اولار دنیاده؟!
بیر سبب وار بو ضیافتده، سبب سیزده دئییل
گلمیشیک بیز بورا شادلیقلا. مبارکباده
ایکی نورسته جاوانین بو گئجه شیرنیسی دیر
یعنی شیرینی نیکاح ائیله‌میشیک فرهاده
آرزو ائیلرایدیک کیم، هامی نین اوغلو، قیزی
سوره‌لر عؤمرلرین سئوگی ایله آزاده
بختیار اولماغینی ایسته همیشه خلقین
قورخما، واحد، سنی ائللر سالاجاقلار یاده