قوُبایا(١)

گلمه سه ایدی، گؤزلیم، سن کیمی جانان قوُبایا
دئین اولمازدی، اینان، باغِ گولوستان. قوُبایا
بو گؤزللیک، بو ملاحت کی توتوب هر طرفی
اولاجاق منجه، طبیعت اؤزو حئیران قوُبایا
لاله لر، گوللر آچیلمیش، اوخویور بولبوللر
دئسه لر، سهو دئییل، جنّت و رضوان قوُبایا
بو صفا گولشنینین ذؤقونو حال اهلی بیلر
گؤر نئجه شور سالیر بولبولِ خوشخوان قوُبایا
ممکن اولسایدی، اینان کی گؤزلیم، عاشیقینه
هم سنه ائیلرایدی،هم ده فدا جان قوُبایا
سئوگیلیم، چوخدا قارا گؤزلرینه فخر ائلهمه
گونده یوزلرجه گلیر سن کیمی جئیران قوُبایا
ایندی آباد اولور هر بیر طرفی جنّت تک
توتان اولماز داها بوندان بئله نقصان قوُبایا
واحدم، سئوگیلیم، آرزوم بوایدی، قسمت اولا
کی، اولاق هر ایکیمیز شؤق ایله مهمان قوُبایا

١شمالی آذربایجانین بؤیوک بیر شهریدر.