یاندیم او شمع ِ حُسنونه پروانهلر کیمی(١)
اولدوم اسیر زولفونه،دیوانهلر کیمی
کؤنلومده ساخلارام لبِ لعلین خیالینی
میخانه لرده مئی دولو پیمانهلر کیمی
قاشینلا هم پیالهدی گویا کی، گؤزلرین
چکمیشله تیغِ قتلیمه مستانهلر کیمی
ووردون بو شیشهٔ کؤنلومه سنگِ ملامتی
ائتدین شکست یئرده سینیق شانهلر کیمی
اولما رقیبه یار، روا گؤرمه عاشیقین
باخسین کناریدن سنه بیگانهلر کیمی
ییخدین بو کؤنلومون ائوینی بیر نگاه ایله
ائتدین خراب خانه، ویرانهلر کیمی
واحد،دییلر تازه یئنه مئی پرست اولوب(٢)
خلقه نشان وئردیم اؤزوم، آیا، نهلر کیمی
١مصرع بو شکلیده ده قئید اولموشدور:
یاندیم او شمعِ رویونا پروانهلر کیمی
٢بیت بو شکلیده ده قئید اولموشدور:
واحد،دئییلله کی، تزه دن مئی پرست اولوب
خلقه نشان وئریم اؤزوم، آیا، نهلر کیمی؟