یئنه واردیر

ای گول، سنه کؤنلومده محبت یئنه واردیر
اوّل واریدی وصلینه حسرت، یئنه واردیر
زولفوندن ایدی صبحه کیمی هر گئجه صحبت
هر یئرده، هر عشرتده او صحبت یئنه واردیر
چوخ ظالیمی محو ائتدی، دگیشدیردی طبیعت
سنده، ملگیم، وحشی طبیعت یئنه واردیر
زولفون، نه غم، ائیلرسه کؤنول مولکونو یغما
فتح ائتسه قوشون هر یئری، غارت یئنه واردیر
مین فتنه یاتیب نارایله آهو باخیشیندا
اول مستِ خطادیده ده عادت یئنه واردیر
گؤسترمه او گول چهره نی، قوی بیلمه سین عالم
حاضیردا بیزیم عصرده جنّت یئنه واردیر
واحد، بو غزلده سنه معجز(١) وئریب الهام
صنعتکار اؤزو یوخسادا، صنعت یئنه واردیر

١شاعیر میرزه علی معجز شبستری.