منو
اؤرتر چیچکله گؤزللر مزاریمی!
یا رب ایتیرمیشم، نئچه گوندور نیگاریمی
تئزلیکه سن یئتیر منیم اول گلعزاریمی(١)
یوخدر گولوم، نه اوزله گئدیم سیرِ گولشنه
بختیم بو ایل خزان ائله‌ییب نو باهاریمی
اول لاله اوزلودن منه هر کیم خبر وئره
بالله سئویندیرر بو دلِ داغداریمی
نامرد رقیبین حیله سینه اویدو دلبریم
یاندیردی نارِ حسرت ایله قلبِ زاریمی
باشیم بلالی دیر، اؤلورم کیمسه بیلمه ییر
بیر قاره گؤزلو الدن آلیب اختیاریمی
من بیر وفالی عاشقم، اؤلسم ده عشقده
اؤرتر چیچکله، گولله گوزه للر مزاریمی
یاریم منه اؤلونجه وفا سیزلیق ائیله مز
چوخ چکمیش امتحانه منیم اعتباریمی
بیرده قدح آلیب الیمه باده ایچمرم
تا گورمه یینجه گؤزلریم اول گلعزاریمی
واحد بو شعری یاز حسنه، عؤمرودن گئدیر
بیر وقت اولور کی، خلق اوخویار یادگاریمی
١مصرع بو شکلیده ده قئید اولموشدور:
تئزلیکه سن یئتیر منیم اول نازلی یاریمی