جاندا یاشاریق

سئویره م بیر سنی یاریم، گوزه لیم، ئوزگه نی یوخ
سنده انصاف ائله باری منه ناز ائیلمه چوخ
ئولکه مین سئوگیلی، شفقتلی گوزه ل بیر قئزی سان
گلجک نسلیمین، ان پارلاییجی اولدوزی سان
سئومه مک لیک، نه روا سن، کیمی زیبا گوزه لی
حسن اخلاقی گوزه ل، صحبتی شرین مزه لی
وارلیقیم، حستیم، حیاتیم، هوسیم بیر سن سن
سن منیم روحیم اوچون، بیر ابدی گلشن سن
گون توتولسا، اگر آی باتسا، ضیالر سونسه
یا افق لر منه بیر ظلمته سن سیز دونسه
ینه قلبیمده خیالین مله کیم نور ساچاجاق
طالعیم یوکسلجک، گوگلره ظلمت قاچاجاق
بسلرم دائمی آغوش مرامیمده سنی
باسارام باغریما، شوقیله او نازک بدنی
محرمانه یئتریک وصله گلوب اوینایارق
ساده بیر پاک محبتله جهاندا یاشاریق
یا قبول ائیله ویا، رد جواب ائت، نه دیره م
واحدم بلکه ده یاریم سنه لایق دگلم