تیغِ ابرو

کؤنول، عشاق قانین چوخ تؤ کوب اول تیغِ ابرولار
هاچان، بیلمم، گلیر رحمه جفادان یارِ بد خولار
اولور گؤزدن روان خونِ جیگر، آهیم شراریندان
بو اوددان جیسمیمی، یارب، خیلاص ائیلر آخان سولار
ایلاندیر، قیوریلیب یاتمیش، نیگاریم، گنجِ حُسن اوسته
و یا کیم حلقه لنمیش دؤرِ رویون اوزره گیسولار
سالیب یوز فتنه وآشوب چشمین مولکِ دونیایا
حذر ائیلر، دوشر خؤفه سنی گؤردوکده جادولار
هاچان گؤرسم تجلایِ جمالین شامِ زولف ایچره
اولور گوندوز کیمی رؤشن منه اول شامِ دیجولار
توتوبدور لشگرِ خط عارضین، جانا، خراج ایستر
کی، گویا مولکِ روم اوسته گلیب یغمایه هیندولار
گؤتور زولفون اوزوندن، ای اوزو خورشیددن انور
اولوبدور قلبلر قارا، توتوبدور زنگ گوزگولار
رقیبین طعنه سیندن اینجیییب هئچ اعتراض ائتمه
گر ک صبر ائیله سین عاشیق، ا گر مین اولسا بدگولار
شیکایت ائتمه مک یئی دیر جفایِ چرخِ ظالیمدن
باهارِ عؤمرومو قیلسا خزان گردبادِ قایغولار
داها گوش ائتمه، واحد، پندینه واعظ لرین هرگز
نئجه ائولر قویوب ویرانه جهل ایله او بایقولار