قبله گاهیمسان منیم

ای گؤزلیک کعبه سی، سن قبله گاهیمسان منیم
من گدای عشقینم، سن پادشاهیمسان منیم
اؤزگه بیر جانانا جؤروندن شیکایت ائتمرم
هر جفا ائتسن یئنه، اؤز دادخواهیمسان منیم
جان وئریب، یا جانیم آلسان، اختیاریم سنده دیر
عاجیزم قارشیندا، گویا کی، ایلاهیمسان منیم
زولفِ روخسارین اسیری ماها سالماز مهرینی
سن بولودلاردان چیخان بیر مهر و ماهیمسان منیم
صید قیلمیش کؤنلومو ناز ایله محزون گؤزلرین
مشکِ عنبر تیره لی آهو نیگاهیمسان منیم
من بو فقریمله سنین عشقینده فخر ائتسم نه اولار؟
دولتیم، فخریم، پناهیم، عزّ و جاهیمسان منیم
واحدم، جانا، فرحدن یوکسله ردیم گؤیلره
لطف ائدیب بیردم دئسن کیم، خاکِ راهیمسان منیم