کیمین لیلاسی سان؟

سوئیله ای گول، هانسی باغین سن گولِ رعناسی سان؟
هانسی گولزارِ بهشتین، سروی سن،طوُباسی سان؟
آچما زولفون عطرله بیهوش ائدرسن عالمی
چونکی سن دشتِ ختانین عنبرِ ساراسی سان
نازنین جانان، گؤزللر قارشی دُورماز روُیونا
جمله سیندن سن گؤزل سن، هامی نین اعلاسی سان
باغبانین کیملر اولموش؟ گؤزلرین حئیرانی یام
سن مگر گلزارِ حُسنون نرگیز شهلاسی سان؟
گؤرمه یینجه گول اوزون، جسمیمده قالماز طاقتیم
روحوسان گویا، بو مسکین عاشیقین اعضاسی سان
من کیمی مینلرجه مجنولار اسیروندیر سنین
سؤیله یاریم، دوغرو سؤیله سن کیمین لیلاسی سان
اینجیمه ز، واحد، او گل آه و فغانیندان سنین
سن گؤزللر باغی نین بیر بولبولِ شیداسی سان