منو
تانری ائیله‌مه سین مبتلا سنی!
سوردومسا هامّیدان، دئدیلر، بیوفا سنی
نئیلیم، حقیقی بیلمیش ایدیم آشنا سنی
یوسیف ده اولسان حُسنده، سن مندن اینجیمه
هر یئرده سؤیلرم، گؤزلیم، منِ گدا سنی!
مجنون زامانی لیلی گؤره یدی جامالینی
عشقیندن ائیلر ایدی، اینان، تئز فنا سنی
تقصیریم اولمادان منی سالدین بلالارا
من روحوما سانیردیم، عزیزیم، غذا سنی
بیر کلمه سؤز کیفایت ائدر آنلایان کسه
نا اهله تانری، ائیله‌مه سین مبتلا سنی
فیکره، خیاله، محنته سن سالمیسان منی
جانان، احاطه ائیله‌مه سین بیر بلا سنی
تانریم اؤزو جزا وئره جک ظلم ائدنلره
کؤنلوم ا گرکی، بیر غمه گؤرمز روا سنی
یوخدور گناه سنده، سنه اؤیردنه دیر
بیگانه گؤستریر هامییا کج نما سنی
حال اهلی اولسا، واحد، ا گر سؤدیگین گؤزل
هئچ یئرده بیوفا دئمز اول مه لقا سنی