نه اوچوندور؟

ظلم ائیله مک عشق اهلینه،جانا، نه اوچوندور؟
عاشیق کی، وئریر جانینی، جانا، نه اوچوندور؟
سئومز او قارا زولفونو هئچ کیمسه منیم تک
زنجیره هوس عشقده دیوانه اوچوندور
خلق اولمامیسان عاشیقی اینجیتمه گه، ظالیم!
باخ، گؤر بو گؤزلیک سنه، آیا، نه اوچوندور؟!
هر عاشیقین اؤز سئودیگی معشوقه سی واردیر
گول بولبولول اوچون، شمع ایسه پروانه اوچوندور
بولبول نه بلا چکسه یولوندا سنین، ای گول
قلبونده محبت یئنه بیگانه اوچوندور
زاهید بوراخیب مسجدی، میخانه یه گلمز
بایقوش یاراناندن بری ویرانه اوچوندور
واحد، منی سر دفترِ عشق ایچره یازیبلار
مجنون سؤزو دیللرده بیر افسانه اوچوندور