افسانه دیر منه

سنسیز یئرم بهشت اولا غمخانه دیر منه
کیم آشنا دئییل سنه، بیگانه دیر منه
هر کس کی، پای بندِ سرِ زلفون اولماسا
یوز عاقله م دئسه، یئنه دیوانه دیر منه (١)
شؤقِ روخونله شمع کیمی یاندیم هر گئجه
همدم سرشکِ چشمیله پروانه دیرمنه
آبِ حیاتی بیر بئله زاهید کی، وصف ائدیر
لعلِ لبین یانیندا بیر افسانه دیر منه
زولفونله اولسا، ائیله مز آشفته کؤنلومو
دوشمن او زولف ایچنده گزن شانه دیر منه
عشق عالمینده بونجا بلالر کی چکمیشم
مقصد، طوافِ عارضِ جانانه دیر منه
واحد! جاهاندا باقی قالان عشق مولکودور
اوندا قالان نه وارسادا، ویرانه دیر منه

١مصرع بو شکلیده ده قئید اولموشدور:
یوز عاقلیم دئسه، یئنه دیوانه در منه.