ایسته میر منی!

بیلمم، نه ائتمیشم، یئنه یار ایسته میر منی
اویموش رقیبه، نازلی نیگار، ایسته میر منی
یاندیردی داغِ حسرت ایله خسته کؤنلومو
اول سرو بویلو، لاله عذار ایسته میر منی
یاریمدان اؤزگه نازلی گؤزللرده یوخ گؤزوم
گول ایسته سین، جهنمه، خار ایسته میر منی
بیلمم، نه سیّردیر، او قارا گؤزلو دلبریم
هر دم اولان مست و خومار، ایسته میر منی
اغیارا ناز ائدیر، منی دیندیرمه ییر او گول
گویا خزان یئتیشدی، باهار ایسته میر منی
واحد، ا گر کی، وار بیزه ده ناز ائدن گؤزل
من سئودیگیم او چشمِ خومار، ایسته میر منی