منو
فرزانه اولاندان سونرا
نه غم، الده دولو پیمانه اولاندان سونرا؟!
سنه اومید ائوی میخانه اولاندان سونرا!
جام مئی ذؤقونه واقیف دئییل ایراد ائله ین
اهلی آنلار اونو مستانه اولاندان سونرا!
یا اسیر ائیله قارا زولفه و یا زنجیره
فرقی یوخ عاشیقه دیوانه اولاندان سونرا!
آنلادیم شمع غمیندن نه چکیر پروانه
یاریمین شمعینه پروانه اولاندان سونرا!
ای ییخان کؤنلوم ائوین، ایندی گَل آباد ائیله
کیم باخار بیر ائوه ویرانه اولاندان سونرا!
عشق لیلادا نه‌لر چکدیگینی مجنونون
بیلمیشم عاقل و فرزانه اولاندان سونرا!
ایندی، واحد، نه ائدک بس، الیمیزدن نه گلر
آشنالر بیزه بیگانه اولاندان سونرا!