منو
ائده سن!
عهد قیلدین، گؤزلیم، کؤنلومو خندان ائده سن
لاله تک باغرینی بیگانه‌لرین قان ائده سن
ایندی دن سنده گرک رحم اولا بیچاره لره
مبتلا قیلدیغین عاشیقله درمان ائده سن
اوُنوت اولکی وفاسیزلیغی بوندان سونرا
سن گرک عدل ایله، انصاف ایله دیوان ائده سن
عاشیقه ظلم ائله ین سئوگیلی مه پاره لرین
آخیرین گؤر، نییه سن ظلمده طغیان ائده سن؟
غافیل اولما،گؤزلیم، کؤنلوم ائوین ییخماقدان!
آشنا قلبینی حاقسیز نییه ویران ائده سن؟
وعده وصلینه حسرت چکن عاشیق چوخدور
دوشمنیندن گرک اؤز عهدینه پیمان ائده سن
نه یه لازم، گؤزلیم، سیرّینی بیگانه بیله
عهد قیلدین، گرک اؤز سیرّینی پنهان ائده سن
راضی اولما، باخا آیینهٔ روخساریوا گول
نییه هر بیر یئتنه نی حُسنونه حئیران ائده سن؟
ادعا ائیله‌مه، واحد، قوُرو بیر جانین وار
اونودا سن گرک اؤز یارینا قوُربان ائده سن