منو
اؤلورم من!
عؤمرومو توکندی بو زمانه، اؤلورم من
گلدیم بو فنا دهرده، جانه، اؤلورم من
بیر لحظه ده کامیمجا منیم چرخ دولانماز
لعنت گله بو دؤرِ جهانه، اؤلورم من
شمسیر قاشین فیکری بودور، قانیمی تؤ کسون
سالما منی ناحاق یئره قانه، اؤلورم من
انصاف می دی، بو نوع وئرم ذلت ایله جان؟
هیجرینده گلیب آه و فغانه، اؤلورم من
محرابِ قاشین فیکری بو خم قدّیمی، ای مه
دؤندردی قاشین مثل کمانه، اؤلورم من
کؤنلوم قوشو اولمازدی او زولفونده گرفتار
بند ائیله‌دی رویوندا کی دانه، اؤلورم من
واحد، دئسم اؤز دردیمی دلدارا، اینانماز
هر نوع توتام الده بهانه، اؤلورم من