بولبول ماجراسی!

گلنده صبح زامانی صداسی بولبولومون
آلیر بو جانیمی شورو نواسی بولبولومون
فداسیدیر اودا من تک گول اوزلو بیر گؤزلین
بو خسته جانیم اولایدی فداسی بولبولومون
بلایه صبر ائده بیلمیر، شکسته خاطیردیر
نه وارسا، قوی منه گلسین بلاسی بولبولومون
منیم کیمی اودا بیچاره دیر، فلکزه ده دیر
نه وار طبیبی، نه درده دواسی بولبولومون
همیشه کنجِ قفسده اسیرِ محنت دیر
نه دیر ثبوت ائله ین، یوخ جزاسی بولبولومون
محبت اهلی بلادان اؤلونجه قُورتارماز
باشیندا چوخدور هله ماجراسی بولبولومون
جمالِ یاره باخیب، واحد، هر سحر یالوارما
کی، مستجاب اولور هر بیر دعاسی بولبولومون