قان اولان کؤنلوم

گلیبدر تنگه، ای ظالیم، ستمله قان اولان کؤنلوم
همیشه باغِ وصلینده گولوب خندان اولان کؤنلوم
دوشوب مجنون کیمی صحرایه بیر لیلی فراقیندا
بوتون عاشیقلر ایچره منبعِ عرفان اولان کؤنلوم
نه اولدو بیلمه دیم، دوشدو جدا گولزارِ کویوندان
همیشه خوانِ وصلین بزمینه. مهمان اولان کؤنلوم
کیمه بیلمه م گئدیب اظهار قیلسین محنتِ عشقین
دؤنوبدور قانه هجرینده غمی پنهان اولان کؤنلوم(١)
نه چاره ائیله سن، بیلمه م، خلاس ائتسین ئوزون غمدن
اسیرِ محنت و پا بستهٔ هیجران اولان کؤنلوم
اولورمی بیر زمان خرم، یئتیشسه وصلِ جانانه؟
غمِ هیجراینلا، افغانلار چکیب، گریان اولان کؤنلوم
منم فرهادی عصرین، سئودیگیم، واحد، گؤزللردر
اودورکی، لاله داغین گؤستریر ویران اولان کؤنلوم

١بیت بو شکلیده ده قئید اولموشدور:
کیمه بیلمه م کی، اظهار ائیله سین بو محنتِ عشقین
دوشوب، ای غنچه لب، درده غمی پنهان اولان کؤنلوم