وطن محبتی!

یاییلدی سئوگیمیز، ای شوخ، هر دیاره بیزیم
بوتون محبتیمیز چیخدی آشکاره بیزیم
گول اوزلو شوخ گؤزللرله اؤلکه میز بزه نیب
نه احتیاجیمیز ایندی یئنی باهاره بیزیم
فرحلی یوردوموزون نازنین صنم لرینین
آیاقلاریندان اؤپور،آی، گونش، ستاره بیزیم
بیزی سئویندیرن،آنجاق وطن محبتی دیر
یوخ عشقیمیز بو گؤزل اؤلکه دن کناره بیزیم
وطن چیچک لرینین بیز سئویملی بولبولویوک
نه مئیلیمیز گوله واردیر، نه لاله زاره بیزیم(١)
اولایدی کاش ائله بیر اهلِ حال دونیاده
بوتون بو سئوگیمیزی سئویله یه یدی یاره بیزیم
بو آرزوداییق هر گون بؤیوک طبیعتدن
یوز ایل ده عؤمرموز آرتیرا دوباره بیزیم
زمانه گئت – گئده، واحد، دؤنوب بهشت اولاجاق
نئچون کی، قدرتیمیز وار هر اقتداره بیزیم

١مصرع بو شکلیده ده قئید اولموشدور:
کی نغمه میز یاییلیر باغ و لاله زاره بیزیم.