قانان اولا

جان قربان ائیله‌سن لایقدیر، لایق،
بیر یار کی، مطلبی تز قانان اولا...
قاشینان، گوزونن اشارت بیله،
ئوزونه دیمه‌میش، سوز قانان اولا...
جانیم قربان اولسون او اهل دیله،
قاشلارین اوینادا، گوزوندن گوله،
دیل ترپتمه‌میشدن دردینی بیله،
قربانام گوزونه، گوز قانان اولا...
علی‌عسگر سویله‌ییر سوز مختصرین،
عاغیلدان دوز اولا، کمالدان درین.
ائشیدنلر دییه: احسن، آفرین..!
اگر مجلسینده یوز قانان اولا...