اؤتدو جاوانلیق، قاراباغ

جاناوار نسلینه صرف ائتدی دومانلیق قاراباغ
کی، اولا اونلارا هر دمده یاوانلیق قاراباغ.

قاراباغ آتلاری‌نین کئچدیگی داغلار-دره‌لر،
ارمنی ائششگینه اولدو سامانلیق قاراباغ.

ایروان خانلیغینی ضبط ائله‌مکدنسه قاچیب،
باکیدا قورماغا گلدیک تزه خانلیق قاراباغ.

بو اونا، او بیری بونا، بو بیری اونا، او بیرینه بو،
بئله زنجیرله گئدیر حؤکم-روانلیق قاراباغ.

چکمه‌سک گرچی تومانیانین اَییندن تومانین،
فاطی‌یا اولمایاجاق یوخسا تومانلیق قاراباغ.

ایکی عقربدن آسیلمیش یئکه کفکیر کیمی‌ییک،
گاه او یانلیق اولوروق، گاه دا بو یانلیق قاراباغ.

دهشتینله بابا پۆنهانا عذابلار وئردین،
حسرتینله سوووشوب اؤتدو جاوانلیق، قاراباغ.