بو آدام، بیزیم آدامدیر

گؤزو آج، خیالی خامدیر، بو آدام، بیزیم آدامدیر،
یئدیگی تامام حارامدیر، بو آدام بیزیم آدامدیر.

یئمک ایله دویماق اولمور، دئدی کی، وطن مالیندان،
یالاییم دویوم مقامدیر، بو آدام بیزیم آدامدیر.

نئچه ایلدی پارلاماندا، گؤزونو دؤیوب اوتورموش،
پولو چوخ، اؤزو عاوامدیر، بو آدام بیزیم آدامدیر.

دئسه کی، مۆسلمانام من، حذر ائت اوزاق گز اوندان،
دئسه ائرمنی قودامدیر، بو آدام بیزیم آدامدیر.

آلینیب اگرچی گؤرسن، نه‌یی وار تامام الیندن،
یئری داش قفسدی دامدیر، بو آدام بیزیم آدامدیر.

او گلن قوناق-قارادان، من اؤلوم نیگاران اولما،
آدی نولا کی، آرامدیر، بو آدام بیزیم آدامدیر.

یزیده دئسه بابامدیر، اونا لعنت ائیله، پۆنهان،
دئسه کی، بابام ایمامدیر، بو آدام بیزیم آدامدیر.