نه یامان ائیلهمیسن رۆشوته عادت، آی آتا،
یؽخاجاق ائومیزی بیر گۆن بو جینایت، آی آتا.
سنه منصب وئریلیبسه، او دئمکدیرمی مگر،
تیکهسن نسلینه هر یئرده عیمارت، آی آتا.
عملینله منی رۆسوای-جاهان ائیلهمیسن،
چکیرم دوستلار آراسیندا خجالت، آی آتا.
سنین اکرانداکی یالتاقلیغین اۆزموش آنامی،
اونا ریشخند ائلهییر کۆلّ-جماعت، آی آتا.
بیلیرم، سن ده آلیرسان یؽغاسان وئردیگینی،
وئرمهسن اوستولووا یوخدو ضمانت آی آتا.
سالمیسان زیندانا یۆزلرله گۆناهسیزلاری سن،
اونلارین قارغیشی قویماز بیزی راحت، آی آتا.
گمیچی اؤز گمیسینده سنه یئر وئردی فقط،
گمیسین ایستهدین اوندان بو خیانت، آی آتا.
هارا گئتسن سون اۆمیدون یئنه الله اولاجاق،
تؤوبه قؽل، گل نامازا ائیله عیبادت، آی آتا.
خلقدن پۆنهان اولان ثروتی قایتار خالقا،
ماجالین اولمایاجاق گلسه قیامت، آی آتا.