دوستاقلارا قالدی

حسرت دولو گؤزلر دیکیلیب داغلارا قالدی،
یۆکسکلری وئردیک اۆمود آلچاقلارا قالدی.

تورپاقلاریمیز گئتدیگی گۆندن الیمیزدن،
ال‌لر اوزانیب شور-مزه تورپاقلارا قالدی.

آللاه‌دئین اولدو، دئییلن‌لر بوشا چؽخدی،
یئرسیز هده قورخو قورو بارماقلارا قالدی.

خوفدان ائله گۆلدو، ائله بیل مایدا گۆل آچدی،
واجیب ایشیمیز مایگۆلو یالتاقلارا قالدی.

شنلیکده بیر آلچاغی شیشیردیب داغا قویدو،
منلیک آیاق آلتینداکی تاپداقلارا قالدی.

اَیری بئل ایله اکدیگی ده چؽخدی اَییلمیش،
یعنی کی، بو خیصلت گله‌جک چاغلارا قالدی.

گؤی پارتلادی یئر چاتلادی نانکورلار الیندن،
اوچدو حارام ائولر داشی چاتداقلارا قالدی.

بایرام گۆنو بایراقدارا دیدیکجه تپیکلر،
بایراق کیمی یۆکسلمک او بایراقدارا قالدی.

دؤولت، اونون اوغرونداکی یالتاقلارا، پۆنهان،
ذیلّت وطن اوغرونداکی دوستاقلارا قالدی.