آغلاماغیم وار، گؤزلیم

نه ایشیم وار، نه ائویم وار، نه باغیم وار گؤزلیم،
نه پولوم وار، نه اتیم وار، نه یاغیم وار گؤزلیم،

دئمه کی، یوخدو باغیم من تره‌وزدن کاسیبام،
کابینتلرده کودوم، بالقاباغیم وار گؤزلیم.

نئینیرم من ماشینی گرچی منی درد آپاریر،
اللی دؤرد آت گۆجونه تن آیاغیم وار گؤزلیم.

منه طعن ائیله‌مه کی، ائوده چؽراغیم یوخدور،
واجیب اولدور کی، دنیزده «چؽراغ»اؽم وار گؤزلیم.

نه اولار کی، باکی‌یا ائرمنی تشریف بویوروب،
ائرمنی‌ینن آخی بوردا جالاغیم وار گؤزلیم.

منی توی مجلیسینه بیر حاجی دعوت ائله‌دی،
دئدی «شوللار» شۆشه‌سینده عاراقیم وار گؤزه‌لیم.

بدگومان اولما کی، دریایا گئدرسم قورویار،
چۆنکی دریا قدری آغلاماغیم وار گؤزلیم.

یئدیلر، قویمادیلار اورتادا بیر شئی قالسین،
اینجیمه سؤیله‌سم آنجاق قؽراغیم وار گؤزلیم.

ساچیم آغ، ساققالیم آغ، نئینیرم اؤلسم کفنی،
بخت-پۆنهانه سئوین، پولسوز آغیم وار گؤزلیم.