بیر کور تانیییرام، گؤزو کورسا دا،
اؤزو کور دئییل.
بعضاً غم اودوندا قوورولورسا دا،
عاقلینا، حیسّینه او نانکور دئییل.
گئجهل-گۆندوزلو یازیر، اوخویور.
عاقلینین گؤزویله او گؤرور، دویور.
آنجاق... بیری ده وار... کور دئییلسه ده،
گؤزو گؤرمهییر.
دوستو گؤز اؤنونده اؤلدورولسه ده،
گؤرمهدیم دئییر...
یاخشییا اورتاقدیر، یامانی گؤرمور،
او، ساعتا باخیر، زامانی گؤرمور.
فیکرینی، حیسّینی اوجادان دئمز،
بعضاً گؤردوگونو گؤرمک ایستهمز.
گؤزلری گؤرمهین کور دئییل هله،
گؤرمک ایستهمهین کوردور، دئیردیم.
بئله مۆقوّایا، بئله جاهیله
حیاتین اؤزو ده گوردور دئیردیم.