اوغرولار

یوسیف، میلیس دوستوم، اود کیمیسن سن،
اوغرونون، اگری‌نین قنیمیسن سن.
آنجاق...
جۆربه‌جوردور، آخی، اوغرولار،
آنبار اوغروسونو توتماغا نه وار؟..

دۆشوب آرخاسینجا بیر طۆفئیلی‌نین،
ایزلر آختارمیسان، ایزلر گزمیسن.
کیچیک اوغرولاردیر هدفین سنین،
بؤیوک اوغرولاردان خبرسیزمیسن؟
گؤزلر اؤنونده‌دیر دۆکان، یا آنبار،
آرتیغی، اسکیگی بیلینیر آسان.
الحذر،
الحذر،
دوستوم، الحذر،
ویجدان اوغروسوندان، قلب اوغروسوندان...
اونلار آچا بیلیر دۆز اۆرکلری،
آنجاق...
قؽفیللیدیر اؤز اۆرکلری...

حاقا قؽلینج چکیب ویجدانا قؽیدی،
اونلار اۆزوموزه باخدیلار دیک-دیک؛
یا سنده، یا منده قۆدرت اولایدی،
اونلارین ایچینی آچا بیله‌یدیک.
وظیفه صاحیبی بیر ایمضا اۆچون
بیزی سۆروندورور اون گۆن، ایگیرمی گۆن...
طالعین آسیلیب تک بیرجه قولدان -
سن بیر ایمضاداکی گۆجه باخ، گۆجه،
بیر ده گؤرورسن کی، داغ بویدا اینسان
بیر جؽرتدان اؤنونده جۆجه‌دیر، جۆجه.
عؤمور پارچالانیب دوغرانیر مین-مین،

سپیلیر یوللارا گئت-گل ایچینده.
گلمزدی بو واختا بیر تیکه حئیفیم،
اگر اریسه‌یدی عمل ایچینده... هارای!
آز عؤموردن واخت اوغورلانیر،
اینام اوغورلانیر، عصب کورلانیر...
بیلمیرم، سن منه باشا سال بونو،
بو هانسی زاماندیر، بو هانسی چاغدیر.
-عصب اوغروسونو، قلب اوغروسونو،
سئوینج اوغروسونو کیم توتاجاقدیر؟
بیر داش صیفتلی‌نین، بیر سرت جاوابی
اومان اۆرکلرده ایز آچیر درین.
بس نیه سورولمور حاقی، حسابی
اۆرکده آچیلان بو شؽریملارین؟..
چوخالیر شؽریملار، آرتیر شؽریملار،
دؤنوب اینفارکت اولور اۆرک ده بیر گۆن.
بیر حلقه‌یه دؤنوب آخیر شؽریملار،
ایری نۆقطه قویور سونونا عؤمرون.
سونرا دئییرلر کی، ایندی آداملار
اؤلور بیردن-بیره داغ اوچان کیمی.
مگر اۆرگینه دۆشن شؽریملار
اونو یاواش-یاواش اؤلدورموردومو؟
بس اونون عؤمرونو کیم اوغورلادی؟
بس نیه دگیشیر اوغرونون آدی؟..
مالی اوجوز آلیب، باها ساتانلار
دللالدیر،
اونلاری جیلوولایاق بیز.
زحمتسیز، مایاسیز قازانان دا وار،
دئ گؤرک اونلارا نه آد قویاق بیز؟..

دللالمی؟ یوخ!
بو آد یاراشمیر اونا،
اونون بیر آدی وار: "مدنی" اوغرو.
تالاییر آدامی گؤز باخا-باخا
بو یئنی جیب کسن، بو یئنی اوغرو...

حاقی تاپداسا دا،
سؤیله، بیر ندن
گۆجلونو چوخ یئرده دوغرو ساییرلار؟
الینی اوزادیب اوزاق قیطعه‌دن،
گۆجسوزون وارینی اوغورلاییرلار.

بئله دللاللارا دئین یوخمو بیر:
حرّاج مالیمیدیر ناموسون، آرین؟ ...
بس کؤکو نه زامان کسیله‌جکدیر
بو گیزلی، معنوی اوغورلوقلارین؟