اؤزومه ده گؤرونمهین
کؤنلوم منیم،
دویغوم منیم،
سؤودام منیم -
آزادلیغیم - اؤز معنوی دۆنیام منیم.
اؤز ایچیمده، اؤز دۆنیامدا
حاکیم ده من،
محکوم دا من.
نئچه یئره قول آتیرام
بیر اؤزکده، بیر تومدا من...
او جوشقوندور،
او داشقیندیر.
مین رنگلیدیر، سۆرکلیدیر.
سؤز - فیکریمین، دۆشونجهمین
قلیبیدیر،
اؤز شکلیدیر.
دۆشونجهلر - هاواداکی قوشا بنزر.
سؤزلر - قوشا آتدیغیمیز داشا بنزر.
دگه بیلسه سنینکیدیر،
دگمهدیسه -
داشدان کۆسمه،
اؤزوندن کۆس.
او اینجیدن الینی اۆز.
اۆرکدهدیر او قؤنچهلر...
هانسی گؤزه گؤرونوبدور
دۆشونجهلر؟