"دۆنیا اولو تانرینین یوخوسودور" -
- دئدیلر.
اونو بو خوش یوخودان آییلتمایین، -
دئدیلر.
اونون اویانماسینی
نیه ایستهمهدیلر؟
او، نه قدر یاتاجاق
درین، شیرین یوخودا؟
اینتهاسیز اولارمی،
واقیعه ده، یوخو دا؟
میلیون-میلیون ایلدی کی،
فؽرلانیر،
یئر کۆرهسی...
نه بئنزینی قورتاریر،
نه اودو، نه قۆّهسی،
هارا گئدیر او بئله؟
یئریندهدیر یئر ائله...
دؤنور گۆنون باشینا
قوّت آلیب او، گۆندن.
نه اؤز اوخوندان چؽخیر،
نه ده اؤز چئورهسیندن...
فؽرلانیر...
گئتمیر آنجاق
نه ایرهلی،
نه گئری...
فؽرلانیب ساپا دۆزور
او، آیلاری، ایللری.
یئرین گؤزو یوخدومو؟
اونون دا
اینسان کیمی
وار اولسایدی گؤزلری،
ترپنردی یئریندن،
چؽخاردی مئهوریندن.
تانرینین دا یوخوسو
داغیلاردی او زامان.
تزه،
باشقا بیر یوخو
اویدوراردی یوخودان.
یئر قوپمادی یئریندن.
اینسان قوپدو...
قانادی
آلدی عمللریندن...
مؤعجوزهلر یاراتدی،
کایناتا ایپ آتدی،
اوچوب آیا دا چاتدی.
اینسان چؽخا دا بیلدی
یئرین جاذیبهسیندن...
اینسانین:
"من تانرییام،
من قادرم" -
سسیندن
تانری دیکسیندی، دوردو.
بویلاندی دؤورهسینه...
گؤردو:
اینسانین اؤزو
دؤنوب یئر کۆرهسینه.
آنجاق...
او، کۆره کیمی
فؽرلانمیر اؤز یئرینده.
او یئریییر، او اوچور
عاقلین اۆفوقلرینده...
یئر کۆرهسی
تانرینین
اویدوردوغو یوخودور،
ناغیلدیر،
افسانهدیر...
بس بویلانیب یوخودان
چؽخان اینسان؟..
او نهدیر؟