اوچون، اوچون،
خیالداکی زیروهلردن آتلانین،
طلبهلریم منیم.
بو گۆن منه گۆوندینیز،
صاباح سیزه گۆونیم.-
بو گۆن اؤنومدهسینیز،
صاباح ایسه آیاق آچیب
گزن شیرین سؤزلریم...
وطنیمه سپهلنمیش
منیم دان اولدوزلاریم...
من اؤیردن،
سیز اؤیرنن،
زامان کئچیر، یئر دگیشیر
بو مۆقدّس دؤورهده...
بو دۆنیانی اؤیرنمیشم
من اؤیرده-اؤیرده...
منه هئچ واخت یاد اولمادی
سئوینجینیز، غمینیز.
خیاللارلا نفس آلان
جاوانلیق عالمینیز.
حیسّینیزه، دویغونوزا
دولا-دولا،
سیزین ایله آددیملادیم
قول-قولا...
سویو هر ایل دگیشیلن
بیر دنیز وار اؤنومده.
سویو آخیر، دورولور.
بیر طرفدن بوشالیرسا،
بیر طرفدن او، دولور.
گنجلیک آخیر،
بو آخینا قوشولدوم.
یاشیم آرتدی...
آنجاق یئنه
سیزینله همیاش اولدوم.
ائله دئدیم: - بو دۆنیایا
نه باخدیم کی، نه گؤرم.
بئش ایل آچیب اؤرتدوگونوز قاپیلان
اوتوز ایلدیر
من آچیرام،
اؤرتورم.
سیزین اۆچون بیتن بیر شئی
بیته بیلمیر منیمچون.
اؤیرهدیرم،
اؤیرنیرم،
گۆنبهگون.
من همیشه
سیزین ایله همیاشام.
هامینیزا یولداشام!
ائل-اوبادا آیاق آچیب
منیم گزن سؤزلریم،
وطنیمه سپهلنمیش
آی منیم اولدوزلاریم،
فیکریمیزدن، سؤزوموزدن
آلدیغمیز ایشیغی،
ائل-اوبادا کؤرپهلرین
اۆرگینه سپین سیز،
بیچین اولماز سپینسیز.
بوگونکو درس
تک بو گۆنون درسیدیر.
تک بو گۆنله
سیز گلمهیین وجده،
یوخ!..
سیزدن حؤرمت گؤزلهییرم،
سجده، یوخ!..
سجدهده بیر حرکت یوخ،
چؽرپینتی یوخ،
آلوو یوخ!
او، هم ساکیت،
هم دونوق!
سن اؤنومده دونورسانسا،
من ده یوخام،
سن ده یوخ!
باشقا سیمده چالمالیسان
منیم کؤهنه هاوامی.
سن منمیسن؟
یوخ!
فیکریمین،
عقیدهمین
داوامی!
سیزین منه سئوگینیزده تاپمیشام
ایتیردیگیم نه وارسا.
منیم سیزه دئدیکلریم
روحونوزدا یاشارسا،
سیزین آیاق باسدیغینیز
هر اوبادا من وارام،
قلبینیزده چاغلارام،
دیلینیزده قاینارام.
گلهجکده یاشارام!
صابیر اولوب،
پوشکین اولوب،
وورغون اولوب
هر درسیمین اؤن سؤزو.
بس نه ایمیش
مرامینین، مطلبیمین
سون سؤزو؟
هاردا بیر ائو اوچوبدورسا،
بیز او ائوه
دیرک اولاق، داش اولاق.
عادیجه بیر اینسان دئییل،
بو وطنه،
اصل وطنداش اولاق!