احتیاط

جسورلارین دلی‌قانلی‌لیغینا شرف نغمه‌سی اوخویوروق. م. قورکی
احتیاط سؤزوندن احتیاطلی‌یام،
احتیاط - هر یئرده احتیاج اولمور.
هر سؤزدن اؤزونو قورایان ایلهام
آیاقدا سۆرونور، باشدا تاج اولمور.
احتیاط گۆدنده یازدیم کؤنولسوز،
ائله‌سی قلبلره چتین یول تاپیر.
اۆرکله، جۆرأتله دئدیگیم هر سؤز
هله قورخاقلا دا آسان دیل تاپیر.
صنعتین، ایلهامین، عشقین گور سسی،
قورخاق اۆرکلردن نیه گئن دۆشور؟
احتیاط گۆدنده، سؤزون گۆلله‌سی
همیشه هدفدن دیدرگین دۆشور.
احتیاط گۆدنلر، آستا گئدنلر،
هئچ سیزی گؤرمه‌دیم منزیل باشیندا.
ای فیکرین اؤنونه داش گیلله‌دنلر،
الی‌بوش قالدینیز سیز ایل باشیندا.
یولو گئده-گئده آددیم سایانلار،
یولونوز یاریدا نیه سهو اولور؟
آنجاق جسارتله آددیملایانلار
یا هر شئیی آلیر، یا دا محو اولور.
احتیاط - بیرتهر باش دولاندیرماق،
جسارت - یا حیات، یا اؤلوم آنجاق!
احتیاط وئرگولدور، نۆقطه دئییل، یوخ!
احتیاط چالاردیر، رنگ اولا بیلمز!
دئییرم دۆنیادا بیر قهرمانلیق
کؤله احتیاطدان دوغولا بیلمز.
قورخور جسارتدن قورخو دا شکسیز
اونون اؤولادیدیر ایگیدلیک، هۆنر.
آخی، جسارتسیز، آخی، اۆرکسیز
قاپینی دؤیمه‌میش هله بیر ظفر.
جسارت چتیندیر، احتیاط آسان،
قورخودور آلچالدان، آخی، هر کسی.
جۆرأتدن قورخمایاق قورخاق قورخودان
قورخو - ایطاعتین دایاق نۆقطه‌سی!
دولاندیم - یۆز اؤلچوب بیر بیچنده من،
یاشایا بیلمه‌دیم بیرجه آن، آنجاق.
من زیان چکمه‌دیم جسارتیمدن،
قورخودان قورخورام، قورخودان آنجاق!