نورالدین باقیر اوغلو، بو شعری آتالاریمیزین خاطیرهسینه حصر ائدیرم.
منیم آتام
اؤز قلبینده دفن ائتمیشدی
اؤز-اؤزونو.
ایچریدن آلیشاردی
اؤز آهییلا، اؤز دردیله
داغیداردی تۆستوسونو.
نه دردینی بیلدیرردی بیر کیمسهیه،
نه غمینی.
ساچلاریندا آغارداردی سیتمینی.
هر آجییا قاتلاشاردی،
او، آشاردی
آشیلمایان سیرتی، داغی،
اونون اۆچون ان دهشتلی بیر عذابدی،
عذابیندان دانیشماغی...
بیر پردهیه کؤکلنمیشدی اونون قلبی -
آخشامی دا، سحری ده،
سئوینجی ده، کدری ده...
سلاممادی اونو بیر آن
نه آغریسی، نه آجیسی
دایاندیغی مقامیندان...
واخت اؤتدوکجه...
ایستهدیگی یؤنه سالیب
زامان اونو خامیر کیمی
کۆندهلهدی.
یامان اونو رندهلهدی...
قؽریشلاندی ایللر اونون
صیفتینده،
زامان اونون قلبینده ده
جؽغیر آچدی.
اۆرگی ده یوخالاشدی...
بولود کیمی هئی بوشالیب
دولدو کیشی،
دگمه-دۆشر اولدو کیشی.
گؤروردوک کی، گاه آچیلیر،
گاه توتولور.
او، هامیدان سئوگی اومور،
قایغی اومور.
...من ده اونون اؤزو کیمی
خسیس ایدیم
اؤز سئوگیمی بیلدیرمهیه.
اونا تسلّی وئرمهیه
اوتانیردیم، سؽخیلیردیم.
اۆرگیمی بیلدیرمگی
اؤز-اؤزومه آر بیلیردیم.
منه ائله گلیردی کی،
اونو اؤپوب قوجاقلاماق
یۆنگول چؽخار،
چوخ شیت چؽخار.
او، کاریخار،
او، داریخار.
نه بیلهیدیم،
ائله بونو گؤزلهییرمیش
بلکه مندن
او، دولاندا،
بولود کیمی توتولاندا...
عادیجه بیر اؤولاد کیمی،
من آتاما
نه قایغیمی بیلدیرردیم،
نه سئوگیمی...
اۆرگینه باش وورمادیم،
قوللوغوندا هئچ دورمادیم...
بیلمهدیم بیر ایستهیینی،
دیلگینی،
اؤز سئوگیمله
ایسیتمهدیم اۆرگینی...
یاشایارکن
منیم اونا کیچیجیک بیر تبسّوموم
سۆزولردی اۆرگینه
کؤنول آچان بیر نغمه تک.
او اؤلدومو؟
بوندان سونرا
تأسوفله آخیتدیغیم گؤز یاشلاریم
کیمه گرک،
نهیه گرک؟
بلی، آرتیق کئچمیش اولا!
کیم گؤروب کی،
تأسوفله قلب بوشالا؟
حاییف! حاییف! نیداسینا
چاتیر آنجاق قۆدرتیمیز.
الیمیزده اولان زامان
بیلممیریک هئچ بیر شئیین قدرینی بیز.
ای اؤولادلار،
آییق سالماق ایستهییرم
ایندی سیزی.
گیزلتمهیین آتانیزا، آنانیزا
سئوگینیزی.
اولورسونوز، دومان اولون،
سیس اولمایین،
نهده خسیس اولسانیز دا
سئوگیده خسیس اولمایین!
ابدیلیک بیر آغری تک
سونرا سیزی یاندیراجاق،
گؤینهدهجک.
تویدان سونرا بو ناغارا
کیمه گرک،
نهیه گرک؟
ایتیردیگین دوغمالاری،
عزیزلری
قایتارا کی، بیلمهیجک.
قلبینیزده دؤیونهجک
اؤزونوزون اؤزونوزه آتدیغینیز
طعنه داشی،
گؤزونوزده حسرت توزو...
اوندان سونرا
کیمه وئره بیلرسینیز
باغرینیزدا سؽزیلدایان
قایغی، سئوگی بورجونوزو؟..