بیر سویوق باخیشین اودو، هنیری،
کؤرپولر یاندیردی، کۆلو قارالدی.
بیر آن باخیب اؤتدون...
باخیشین یئری
چاپیلان کؤنلومده عؤمورلوک قالدی.
آنین ضربهسینی بیر عؤمور یئدی،
نهلر ائتدیگینی آن هئچ بیلمهدی.
یوخدور ایکینجیسی تک عؤمروموزون،
نیه زهرلهدین بیر عؤمرو، نیه؟
ایستی بیر باخیشا مؤحتاجکن اؤزون
بس نیه قؽیمادین اونو اؤزگهیه؟..
یادداشدان بیر یوللوق سیلینیب ایتر
هر عؤمرون، هر گۆنون مین ماجراسی.
گۆلله یاراسینا نه وار؟ تئز گئدر،
گئتمز سؤز یاراسی، ائیهام یاراسی.
نیه دانیشمادین، نیه اۆرکله؟
خوش سؤزه هامینین احتیاجی وار.
اینسان یاشامامیش یالنیز چؤرکله،
سؽنان اۆرکلرین اؤز علاجی وار.
گؤزوموز اؤنونده آرزولار، کاملار،
ناراحات دۆنیادا دینجلیک اولارمی؟
اۆرک سؽندیرمایین سیز، ای آداملار،
بۆلبول یوواسینا داش آتیلارمی؟!
سؽنان بیر کؤنوله نئجه دئیک:
"دؤز!" یاماساق بیلینر سؽنیغین ایزی.
بعضاً خوش بیر باخیش، خئیرخواه بیر سؤز،
گۆنلرله، آیلارلا یاشادیر بیزی.
داغسانسا، سن دانما تپهنی، دۆزو،
بو دارکؤنوللولوک نه وئرر بیزه؟
خوش بیر تبسّومو، گؤزل بیر سؤزو
بعضاً بیز قؽیمیریق بیر-بیریمیزه؟
اۆرک ده قوجالیر، آخی، ایلبهایل،
او بیزه همدمدیر، بیز اونا سیرداش.
اینفارکتدان قورخورسان؟
اۆرک داش دئییل،
اؤزگهنین قلبینی سؽندیرما، قارداش!
من سندن اینتیقام، سن مندن قیصاص؟..
آلیر وئردیگینی اونسوز دا زامان.
آداملار، آداملار،
دۆشونسک بیر آز،
هامییا یئر چاتار، گئنیشدیر جاهان.
اجل باشیمیزا کؤلگه سالمامیش
سیزدن "جان" ائشیدیم، سیزه "جان" دئییم.
آداملار، آداملار،
یالنیز خوش باخیش،
بیر ده تبسّومدور سیزدن ایستهییم.