آنام ناماز اۆسته ال آچیب گؤیه
اللها یالواریر "یا ربّیم!-دئیه:-
سنسن خلق ائلیین گؤیلری، یئری،
جاندان شیرین اولور بالا، آی الله.
سن منیم عؤمرومدن کسیب ایللری،
بالامین عؤمرونه جالا، آی الله!
بو ندیر؟ آرزویا، دیلهیه بیر باخ،
گؤر بیر نهلر کئچیر آنا قلبیندن؟
چوخدور بو دۆنیادا هدیّه... آنجاق
عؤموردن هدیّه گؤرمهمیشم من.
ایسترم، بیر آنا، بیر بالا سؤزو
لۆغتده سؤزلرین اؤنونده گئده.
اوجا اولدوغوندان آنانین اؤزو
اوجادیر، بؤیوکدور هدیّهسی ده.
چوخدور هدیّهلر اینسان آدینا:
قیمتلی زینتلر، قیمتلی داشلار.
آنا حیات وئریر اؤز اؤولادینا،
هم ده اؤز عؤمروندن عؤمور باغیشلار.