کیمدیر منیم
ان قورخولو دۆشمنیم؟
کاش بیلهیدیم بونو من.
او ضربه وورمامیشدان
کسهیدیم یولونو من.
کیمدیر منیم
دۆشمنیم؟
یاخشیمی قویوب
یامانیمی دانیشانمی؟
یوخ!
عئیبلریمی دئییب
آرخامجا گۆلنمی؟
یوخ!..
منیم نؤقصانلاریمی
مندن یاخشی بیلنمی؟
یوخ! یوخ! یوخ!
اونلارین گؤزلرینی
تاخایدیم اؤز گؤزومه.
اؤزگهلرین گؤزویله
باخایدیم اؤز-اؤزومه.
باجارسایدیم بونو من
بو دۆنیادا نه دردیم...
من اوندا اؤز-اؤزومو
داها یاخشی گؤرردیم.
اوندا عیبلریمه
اؤزوم دۆشمن اولاردیم؛
گؤرسهیدیم اؤز-اؤزومو،
اوندا من، من اولاردیم! آه!..
منی مندن گؤزل
گؤره بیلن دوستلاریم،
آرخامجا قه-قه چکیب
منه گۆلن دوستلاریم،
گۆلون، ائله گۆلون کی،
چاتسین قولاقلاریما
سیزین گۆلوشلرینیز.
یامانیمی دانیشین،
ائله دانیشینکی، سیز
من ده خبردار اولوم.
دانیشین، قویمایین کی،
من اؤزومه وورولوم.
ان قورخولو دۆشمنین
گلرم عؤهدهسیندن،
آنجاق اؤزوم اؤزومله
باجارا بیلمیرم من،
باجارا بیلمیرم من.
اؤزوم اؤزللریمله
بیر گۆن بال ایچیرمسه،
بیر گۆن زهر ایچیرم.
من حیات یوللاریندان
آیاقلاریملا دئییل،
عقیدهمله کئچیرم.