گۆندوزلر گزیرم بیزیم شهری،
آخشاملار قونورام اؤز بوداغیما.
آخشاملار خیالیم گزیر هر یئری
دۆنیانی سؽغدیریب دار اوتاغیما.
ماسا آرخاسیندا من سؤز اوردومو
چکیرم اۆستونه هر قارانلیغین.
من بۆتون دۆنیانی،
من اؤز یوردومو
میزیمین اۆستونده گؤرورم آیدین.
ماسا آرخاسیندا... الیمده قلم
گزیرم دۆنیانی من قاریش-قاریش،
منیم خیالیمین، دئییرم، بو دم
آیاغی دگمهین بیر یئر قالمامیش.
ماسا آرخاسیندا کؤنلوم بیقرار –
یولوم نئچه کنددن، شهردن دۆشور.
ویئتناما یاغان آغیر بومبالار
ائله بیلیرم کی، ائویمه دۆشور.
گۆجلویم! - دئمهلی، من حاقام، دئیه،
ظۆلم حاق پالتاری گئیینیر بو گۆن.
منیم میصراعلاریم دؤنور گۆللهیه
ائوینی توتاندا گۆجلو گۆجسوزون.
سینادا یاندینر گۆن گؤیو، یئری،
یئنه ده عربین وطنی داردا.
"سو" دئییب یاناندا عرب عسگری
منیم دوداقلاریم چاتلاییر بوردا.
ماسا آرخاسیندا اؤز اۆرگیمی
مشعله دؤندریب یاندیریرام من؛
دۆنیانین دردلری مۆرکّب کیمی
آخیر قلمیمدن، آخیر صۆبحهجن.
اۆرگیم ایلهاملا، سؤزله دولاندا
هر سطریم کؤنلومدن اود آلیر منیم.
دویان بیر اۆرکده تئل قؽریلاندا
شعریمین وزنی ده قؽریلیر منیم.
ماسا آرخاسیندا... تورپاغین، یئرین
ایستی نفسییم، ظریف عطرییم.
من هاوانین دئییل، حادثیهلرین،
کؤنول دۆنیاسینین بارومئترییم.
قوشورام آردینجا خوش خیاللارین،
یئر منیم، گؤی منیم، آسیمان منیم.
قلبیمدن مین قلبه گئدن یوللارین
اوّلی باشلانیر ماسامدان منیم.
ائله کی، قالخیرام ماسا دالیندان
خیالیم کیچیلیر، فیکریم گریلمیر.
بایاق اوتاغیما سؽغیشان جاهان
ایندی اؤز-اؤزونه سؽغیشا بیلمیر.
بایاق اؤز جانیما، قانیما قؽیدیم،
بیلمیردیم واخت کئچیر، یاتاسییام من؛
بایاق بیر دۆنیانین وطنداشییدیم،
ایندی اؤولادیمین آتاسییام من.
اوخویون کؤنلومو شعرلریمدن،
کؤنول گیزلنمهسین سؤز آرخاسیندا؛
دۆنیانین ان گؤزل آدامییام من
ایلهام عالمینده، میز آرخاسیندا.