منیم اؤولادیما آنا دیلینده
درس دئین "عاقیللی" مۆعلّیمه باخ.
"وطن"، "وطن" دئییر، اؤز اؤولادینی
اجنبی دیلینده اوخودور آنجاق.
اؤزگهیه: "دیلینی اؤیرن!" - دئییرسن،
اؤزونسه... بو دیلی بهینمهییرسن!..
نه دئیک بو میسکین ریاکارلیغا؟..
یوخسا، اؤز قؽنینی بهینمیر باغا؟..
بیر ندیر، بئش-آلتی دیل بیلسین گرک،
بیزیم صاباحیمیز - کؤرپهلریمیز.
وطن دیلینه ده دوداق بۆزمهیک،
بوردان آیاق آچیب، یولا چؽخاق بیز.
ائوده آیاق آچیر اوّلجه هر کس،
سونرا اوزاقلارا دۆشور قدملر.
ایلکینی بیلمهین سونونو بیلمز،
ائودن اۆز دؤندرن چؤلده ورملر.
"اوّل ائوین ایچی" دئمیشلر ندن؟
سن چؤلو بیلمزسن، ایچی بیلمهدن.
یاخشی بیلمک اۆچون اؤزگه بیر دیلی
اوّل اؤز دیلینی یاخشی بیلمهلی.
نیه اؤزوموزو اؤگئی سایاق بیز؟
نیه آتامیزی تانیمایاق بیز؟
اؤزگهنی سئویرسن؟
اینانمیرام من!
اؤزونو سئومهین اؤزگهنی سئومز.
وطنین دیلینه گرکسیز دئین
وطنین اؤزونو نئجه سئویر بس؟
اۆزونه دورسایدی یئدیگین چؤرک،
رذیل اولدوغونو اؤزون قاناردین.
دیلیمی دانسایدیم من ده سنین تک
سن کیمه درس دئییب پول قازاناردین؟
وطن غئیرتینی چکمهین اوغول
هم اؤزونه یۆکدور، هم اؤزگهسینه؛
بو دیلده درس دئییب قازاندیغین پول،
یئدیگین چؤرک ده حارامدیر سنه!
بؤیوت بالانی دا سن اؤزون تکی،
دئنن، اؤزون یاشا، عالم یوخ اولسون.
ناموس اولماسا دا کئچینر، تکی
دیلین اوزون اولسون، قارنین توخ اولسون.
سنینچین دۆنیایا دگر، آ نادان،
بیر آنلیق اؤتری کؤنول خوشلوغون.
مین دفعه کیچیکدیر آتالیغیندان
سنین اینسانلیغین، وطنداشلیغین!