بؤیوک عملپرور، بؤیوک وطنداش
ج. ممّدقولوزادهنین عزیز خاطیرهسینه
"آنامین کیتابی!" - اوخودوم بیر ده،
بو گۆنوم دۆننله گلدی، گؤروشدو؛
جلیلین چالدیغی ساری سیملرده
قدیم بیر تمثیل ده یادیما دۆشدو:
خرچنگ - آرابانی چکیر قورویا،
اؤردک - بولودلارا،
کور بالیق-سویا...
آرابا ترپنمیر آنجاق یئریندن،
سنین تیمثالینمیش بو حال، ای وطن!
تالاندی بیر زامان دؤولتین، وارین...
وارلییکن ال آچدین سن اؤزگهلره.
یادلار یوخ،
سنی ده اؤز اؤولادلارین
چکدی اۆچ طرفه، چکدی اۆچ یئره.
آنا اۆمید اولدو دوغما اؤولادا،
اؤولاد بئل باغلادی یادلارا یالنیز.
اؤولاد بیلمهدی کی، قونشویا، یادا،
گؤز دیکن قالاجاق شامسیز، چؽراقسیز.
بو دوغما تورپاقدا دوغولوب اونلار،
دئدیلر، بیز هارا، بو تورپاق هارا،
دوغما کیتابلارا یاد اولوب اونلار
اۆمید باغلادیلار یاد کیتابلارا.
آنامین کیتابی چاتدی ایمدادا،
دئدی: "اؤزونه باخ، ال آچما یادا؛
واخت چاتیب اوزاغی، یاخینی تانی،
بیل، سنین اوّلین، آخیرین ندیر،
وطن خستهدیرسه، اونون درمانی
کناردا دئییلدیر، اؤز ایچیندهدیر..."
آنانین کیتابی! تاریخدن قدیم،
چیچکدن - تزه-تر، گؤیلردن درین.
آیاغی آلتیندا تورپاق گؤرمهدیم
آنادان اۆزونو چئویرنلرین.
بو بؤیوک مطلبی بیلمهدیک بعضاً،
بیزی بؤله-بؤله چکدیلر دارا.
ال چکیب مۆقدّس آتشیمیزدن
یۆزایللر باش اگدیک یاد کیتابلارا...
تاپداندی آنامین شرفی، شانی،
بیزدن ثروت آلیب سؤز گتیردیلر.
بو بویدا اؤلکهنی - آذربایجانی
بیر عرب قؽزینا جئهیز وئردیلر.
منی باغیشلاسین شهریاریمدا،
اوتوز ایل اؤزگهیه "برادر" دئدی.
اؤز دوغما یوردوندا، اؤز دیاریندا
دوغما آناسینا او، "مادر" دئدی.
ائله کی، یومروغو یئره دیرندی،
درحال یادا دۆشدو دوغماجا کندی.
بونلار ناغیل دئییل، تاریخدیر، آنجاق
تاریخین حؤکمونه، کؤنول، یاخشی باخ!
گل بیلک، اینسانمی، زامانمی حاقسیز
گاه اونا، گاه بونا بیز یاماق اولدوق.
کیچیک کومامیزی قویوب چؽراقسیز،
اؤزگهنین قصرینده بیز چؽراق اولدوق.
بو بؤیوک دردلری دۆشوندو جلیل
اونو قورخوتدولار،
اؤز آمالیندان
نه بئزدی،
نه کۆسدو،
نه دؤندو جلیل!
او دا بو گۆنلره اۆمید باغلادی،
آییلدیب آتامی،
بیر اۆرک کیمی
میلیون اۆرکلرده دؤیوندو جلیل!