سهولریم - سهولریم

شۆبهه‌لریم، گۆمانلاریم،
سهولریم، نؤقصانلاریم،
فریادلاریم، عذابلاریم، آمانلاریم!
من قاچدیقجا الینیزدن،
عملیمه
یاغیش کیمی یاغیرسینیز
نئیله‌ییم کی،
سیز اؤزومدن آغیرسینیز.
سالیب منی عذابلارا
منه گئندن باخیرسینیز
بیر یاد کیمی.
من گیزله‌ده بیلمه‌میشم عؤمروم بویو
دوداغیمین آرخاسیندا اۆرگیمی...
او آلیشیب.
او دانیشیب.
یانیمدا دوست اولمایاندا
دانیشمیشام اؤزباشیما.
اۆرگیمین پؽچیلتی‌سی
دگیب منیم اؤز باشیما
توخماق کیمی...
نه سئوگیمی گیزلتمیشم،
نه کینیمی...
عذاب وئریب گۆنلر منه،
آیلار منه.
آدام وار کی، عؤمرو بویو
دوداقلاری تبسّوملو
تبسّومو،
بیر پای کیمی پایلار سنه،
پایلار اونا،
پایلار منه...
دیلی ایله اۆرگی‌نین آراسیندا
یۆز-یۆز ایللیک یوللار دورور.
دوداغیندا گۆللر آچیب
اۆرگینده کوللار دورور.
هر سؤزونون اوّلی "جان"، آخیری "جان"
بئله یاشار آخیراجان.
اۆرگی بوز،
سؤزو ایستی،
اؤزو ایلیق.
چکمه‌میشدیر عؤمرو بویو
بیرجه دفعه پئشمانچیلیق.
بیلمه‌میشم،
نه چوخ ایمیش
بیرجه قؽریق نؤقصانیمی
شیشیردنیم.
بیر دریاجا کدریمدیر
بیر داملاجا سهویم منیم.
باشقالاری کئچر، بلکه، تقصیریمدن
"گۆناهکارام، کئچ!" - سؤزومه.
باغیشلایا بیلمه‌میشم
اؤز سهویمی من اؤزومه.
سهولریم بوغازیمدان برک یاپیشیب
یوخومو دا دارا چکیر.
ویجدانیمی اورا چکیر، بورا چکیر.
اۆرگیمده ووروش گئدیر
من کیمینله ووروشورام،
هئچ بیلمیرم.
یؽخیلیرام، اگیلمیرم.
هئچ بیلمیرم بو ووروشون آدی نه‌دیر،
قصدی نه‌دیر؟
غریبه‌دیر،
غریبه‌دیر!
سهولریم - آلنیمداکی قؽریشلاریم،
قلبیمده‌کی ووروشلاریم.
عذابلاردا من اؤزومم،
من کؤنلومون اؤز سسی‌یم،
راحتلیقدا اؤزگه‌سی‌یم...
سهولریم - اۆرگیمین دیلیمده‌کی
هم سئوگی‌سی،
هم نیفرتی.
سهولریم - دوست دانلاغی،
یاد تؤهمتی.
سهولریم! سیز منسینیز،
من ده سیزم!
من سهویمده سهوسیزم!