"حئیرت، ای بۆت!" *
دئدی دۆنیایا قلم
عالمی بیر سئیریم یۆز حئیرتیمدیر.
من حئیران اولماسام یازا بیلمرم
منیم نغمهلریم - اؤز حئیرتیمدیر.
بعضاً دئییرلر کی، دگیشیب زامان
هر شئی عادیلشیب...
نه سئوینج، نه غم!
ائله بیر مؤعجوزه تاپیلماز،
اینسان،
اونا حئیرتلهنه...
حئیرتلنمیرم!
اگر بئلهدیرسه، کۆسمه زاماندان.
قلبینه یاخشی باخ!
قلبین چوخ سویوق!
حئیرت قورتاریبسا، دئمک، جاهاندان
گؤزللیک کؤچوبدور، خبریمیز یوخ!..
گؤره بیلمیرسنسه گؤزللیکلری،
بو عالم سنینچون گۆناهکار اولور؟
گؤزو بوز باغلایان بولاقلار کیمی،
سویوق آدامین دا قلبی کور اولور.
گؤیلر دامار-دامار،
یئر لاغیم-لاغیم...
بو حئیرت، بو سوال دیندیریب منی.
هله کؤرپهلیکدن بو حئیرانلیغیم،
سوال کؤهلهنینه میندیریب منی.
من اؤز حئیرتیمین چمنلیگیندن،
جاوابلار آختاردیم، سواللار دردیم.
حئیران قالماسایدیم بو دۆنیایا من،
حئیرتسیز حالیما حئیرتلنردیم.
حئیرانام آچیلیب هئی واراق-واراق
ساچیلان لچگین مین-مین رنگینه.
سیز دئیین، مۆمکونمو حئیران قالماماق،
آهنگسیز دۆنیانین اؤز آهنگینه؟..
هانسینی سؤیلهییم؟
هانسینی ساییم؟
دۆنیا باشدان-باشا مین سیرّ، مؤعجوزه.
سیز دئیین، من نئجه حئیران قالماییم،
یئرینده دئییلن گؤزل بیر سؤزه؟..
حئیرانام همیشه یانان کؤنلومه،
آلووو شعریمدیر، کۆلو گؤرونمور.
حئیرانام توخوما، حئیرانام توما،
ایچینی گؤرورم، چؤلو گؤرونمور.
اوتون پؽچیلتیسی، کۆلگین عطری،
تورپاغین نفسی - حئیرت نیداسی!
بۆلبولون جه-جهی، چیچگین عطری،
سویون زۆمزومهسی - حئیرت نیداسی.
حئیراندیر!
بوداقلار یارپاغا حئیران،
تورپاق داشا حئیران،
داش داغا حئیران.
سئل دنیزه حئیران،
سو گؤله حئیران،
چؤل چمنه حئیران،
گۆل گۆله حئیران!
اؤزونه حئیرانکن بو جانسیز عالم،
ای اینسان!
دئمه کی، حئیرتلنمیرم!
همیشه قورخموشام بیگانهلیکدن،
یاشا حئیران-حئیران، اؤل حئیران-حئیران!
منی سویوق-سویوق دیندیرینجه سن،
"جان" دئییب جانیمی آل، حئیران-حئیران!
سن اودو، آتشی اؤزگهدن اومما!
عالم توتماییبسا، کؤز اۆرگینده.
بصیرت گؤزونو آچ بو دۆنیایا،
آختار حئیرتی ده اؤز اۆرگینده.
حئیرتیم یاشاییر درد-سریمده.
اؤلسم...
گؤزلریمی قاپامایین تئز.
باخین گؤزلریمه!
ببکلریمده
بیر حئیرت ایشیغی گؤرهجکسینیز.
* فۆضولینین "حئیرت ای بۆت، صورتین گؤردوکده لال ائیلر منی" میصراعسینا ایشارهدیر.