پیادا-سرنیشین (ایکی یولچو)

باخدیق بیز همیشه قاباغا، اؤنه.
بویلاندی صاباحا بو گۆندن ایللر.
بیر نفر وارمی کی، سؤیله‌سین منه،
نئجه گلیب کئچدی عؤمروندن ایللر؟

یایین بۆرکوسونده، قؽشین قاریندا
هامی‌نین قیسمتی بیر اولمور یقین.
عؤمرون ایری-اۆیرو دولایلاریندا
کیمی پیادادیر، کیمی سرنیشین.

پیادا کئچمیشم من بو یوللاری،
کۆمکی اومموشام آیاقلاریمدان.
قلبیمین اودویلا شاختانی، قاری
اریتدیم، عؤمرومون ایلک چاغلاریندان.

یانیمدان ماشینلار، قاتارلار اؤتوب،
منه ال ائدیبلر پنجره‌لردن.
اونلارین باشیندان یاغیش، قار اؤتوب
گؤیلرین آلتیندا ایسلانمیشام من.

سرنیشین یول گئتدی، یولدان خبرسیز،
بیلمه‌دی بو یولدا کله-کؤتور وار.
آنجاق پیادانین، خبر - اترسیز
آلنیندا ایز آچدی گئتدیگی یوللار.

یول اؤزو آپاردی سرنیشینلری،
یولدا نه ایز قالدی، نه ده توز اولدو.
آنجاق پیادالار گؤردو دۆنیانی،
سرنیشین دۆنیادان خبرسیز اولدو.

سۆرعتی نه قدر یئیین اولسا دا،
سرنیشین منزیله دولاما چاتدی.
داغلارین باشیندان آشدی پیادا
یولو کسه گئتدی، یولو قؽسالتدی.
یولو اؤزو آچان زیروه‌دن کئچر،
یولو یوللا گئدن داغدان گئن کئچر.

قوووشور آی آیا، دولور ایل ایله
مطلبی عینیدیر بو یاریشین دا.
غریبه دۆنیادیر،
سرنیشین ایله
پیادا گؤروشور منزیل باشیندا.

عؤمور یوللاریندا "راحت" گئدنلر –
زیروه‌لر باشینا اوجالا بیلمز.
تکرلر اۆستونده دییرلننر
چاتدیغی منزیلده بند آلا بیلمز.

بیری تکر اۆسته گتیریلدیسه،
بیرینی گتیرن آیاقلار اولدو.
بیری بو منزیلده کیردار ایسه،
بیری بو منزیلده صاحیب‌کار اولدو.