زامان

بیر آی تامام اولدو، دۆز بیر آی،
بیر گۆن
گلدیم قبیریستانا...
آناملا دئییل،
اونون باش‌داشی‌یلا گؤروشمک اۆچون.
دۆزو گؤزلریمه اینانمادیم من،
بیر حئیرت دالغاسی اؤتدو سینه‌مدن.
یاخشی یادیمدادیر...
دفن ائدیلنده
سونونجو قبیردی آنامین قبری.
قبیرله دولودور ساغ-سولو ایندی.

ندن مزارلیقدا واخت دۆشمور یادا؟
دئمه او بوردا دا، بوردا دا وارمیش!
اؤلولر مسکنی - مزارلیقدا دا
زامان، قدم-قدم آددیملاییرمیش!..